今日難得又同肥仔行街，去到銅鑼灣肥仔話想打邊爐，再加埋之前聽肥仔講過牛大人呢間火鍋店瘦仔我又從來未試過，就上咗去食啦。原來呢間牛大人開到周圍都喺，今次我哋係去食銅鑼灣分店。
餐廳評分
品質 ★★★★☆
服務 ★★☆☆☆
清潔 ★★★☆☆
我哋今次用分隔鍋叫咗兩個湯底，但如果要選多種口味的湯就要另加$50。餐廳有 120 分鐘用餐時間限制，但真係可以食到好飽。如果每樣都要試食嘅話應該要請幾個大胃王一齊食，會好抵。
呢一間火鍋店有兩樣唔錯嘅嘢要同大家介紹下，非常有台灣氣息！
一樣就係瘦仔喜歡飲的蘋果梳打，第二樣就係肥仔喜歡食的王子麵啦！自助區嗰度除左有雪櫃蔬菜、肉丸自助區及飲品區外，仲有一個麵區有烏冬／王子麵／韓國即食麵可以自助任取。
肉丸及蔬菜用獨立透明膠兜盛載，保持冷藏，衛生令人食得安心。蔬菜有十多款，丸類有芋頭丸、香菇貢丸、花枝丸、芝心丸及鱈魚丸等…… 肥仔最喜歡芋頭丸，入口帶有迷人軟綿芋頭粒粒，口感一流。
餐廳仲有提供唔同嘅特飲，例如係菊花普洱茶、白桃烏龍茶、桂花烏龍茶，還有酸酸甜甜的洛神花茶，茶香怡人，新津解渴，是火鍋的好拍檔。最後甜品可選 Movenpick 或者係台中仙草凍， 質感Q彈，冰爽降溫 ，為今日火鍋放題畫上完美句號。（但要溫提大家一下唔係樣樣口味嘅 Movenpick 雪糕都有，例如好似肥仔鍾意食的朱古力口味嗰日因為賣晒轉左做奶酪口味）
總結
肥仔誠意推介牛大人比各位鍾意打邊爐嘅朋友仔。