今日係荃灣行街街走咗入海之戀商場，行咗一個圈之後有啲口渴咁啱就見到呢一間叫豆乳狂人嘅舖頭啦！見佢非常多人排隊，肥仔同瘦仔就決定排隊一試。
餐廳評分
品質：8/10
清潔：7/10
服務：8/10
價值：8/10
地址：荃灣海之戀商場二樓 2036 號
營業時間：11:00-22:30
平均每人消費：HK$40
呢間 SOYmart by 豆乳狂人 強調自己係即磨豆漿，另外有個大玻璃望到廚房裏面嘅電腦控制榨豆漿機，感覺呢個餐廳嘅主人對自己嘅品質好有信心先會咁公開比人廚房內部睇光光。呢間舖頭主力賣唔同口味嘅豆漿同埋用黃豆做嘅布甸。餐牌上面非常多唔同口味可以試，感覺不俗。
餐廳採用咗綠色色調，有唔少座位比客人坐低享用飲品，空間感良好唔會覺得壓迫，同埋餐廳亦都有展板特別介紹自己嘅豆漿同埋舖頭嘅由來，非常有趣。
等咗一陣，終於排隊到我哋啦！肥仔叫咗一支朱古力豆漿，瘦仔就揀咗特別款式嘅 Oreo 奶蓋珍珠豆乳。飲咗一淡，就發現同平時飲嘅豆漿有唔少差別，首先佢呢一個豆漿入口非常濃郁，有一種黏漿感需要多啲力氣先可以吞落肚，其次就係佢豆漿嘅味道並無蓋過其他材料嘅味道，同一時間可以感覺到豆漿同其他材料嘅味道共存，唔會有其中一個味道被覆蓋，最後就係未飲完一支就已經覺得飽飽地，飲正常豆漿都唔會有呢一種感覺。肥仔飲嘅朱古力豆漿簡單得黎亦都有濃郁可可味，佢極力推薦。至於瘦仔飲嘅 Oreo 奶蓋珍珠豆乳同朱古力豆乳比黏漿感更重，好似食飯咁要認真吞落肚，另外就係奶蓋味道非常濃郁簡直係三重享受，就係飲完之後個肚脹曬好飽。
