評分
五星級酒店
訂房途徑：會員套票
價錢：$29XX 連稅
質素：★★★★☆
性價比：★★★★☆
評價
今次選擇 JW 萬豪酒店係因為要同肥仔佢過生日，所以今次住左個比較高級的酒店，等我哋兩個都可以享受一下。JW 萬豪酒店出入口比較多，方便啲唔想咁矚目去酒店嘅人，同埋如果係會員嘅話可以享受更高級嘅服務，例如係延遲退房至 16:00 和快速退房等等。
今次呢間房雖然唔係大房，但係房間設計令空間感大增，唔會感覺好狹窄。房間門口左手邊係衣櫃和雪櫃位，而右手邊就係浴室。今次瘦仔做足功課，知道今次酒店浴缸可以玩泡泡浴，肥仔話想玩好耐架喇。今次特登揀咗兩個 Lush 嘅薰衣草香味泡泡彈，一個負責香味另一個就喺泡泡，啱晒肥仔呢啲鍾意香薰嘅人。
出返來一行入少少就會見到卧室，左邊係電視機，而右手邊係一張大床。床嘅正對面就喺一張書枱同一張大班椅，直對住落地大玻璃，自然光充足。窗外環境優美，可以望到一半維港同一半高樓大廈。酒店背對山丘，感覺舒服，令人放鬆心情。
我哋夜晚 7:00pm 就落左去酒店大堂層的 The Lounge 餐廳用膳。餐廳環境十分優雅，而且格局分明。今次我哋食自助餐，餐廳佈局為閣樓式設計，切分為兩層，下層係用餐區域同甜品區，而上層則提供前菜及熟食（上層亦有提供酒類飲品嘅迷你酒吧）。甜品吧位置佈置精美，非常搶眼，而其他食物則在上層提供，所以肥仔認為 The Lounge 自助餐以甜品為賣點。經過一輪進食之後，肥仔會推薦幾款一定要試下嘅美食比大家：燒味、片皮鴨、雲吞，老火湯。 瘦仔就覺得 The Lounge 嘅沙律、刺身同芝士都非常好。
食完主食當然要試下甜品啦！肥仔黎食自助餐之前有聽講 The Lounge 有一個雪條櫃，但當晚雪櫃裏面並無雪條提供，肥仔覺得有啲可惜。雖然係噉，餐廳仲有雪糕機可以自己整雪糕同落自己喜歡食的配料，都算滿足。餐廳都有其他甜點同蛋糕選擇，但係唔係肥仔喜歡食的款式，所以肥仔覺得好一般。另外餐廳亦都有提供肥仔好喜歡食嘅蝴蝶酥，但係肥仔覺得唔夠脆，有啲失望了。
我哋喺餐廳食完晚飯都已經係 9:30pm 左右，於是就返房享受下同休息。我哋喺房間休息咗一陣之後就準備浸泡泡浴，瘦仔表示浸浸下唔經唔覺係水入面傾下計享受下就 3 個鐘好舒服，差點係浴缸訓著咗添。我哋浸浴完就出去執下相打下文，幾開心咁就過左一日。
第二日起身梳洗之後 9:00am 就落去係酒店 5 樓嘅 JW Cafe 食早餐。肥仔覺得呢間餐廳真係好好食，非常推介比大家試下。無論係品質服務同清潔都做得好好，食物款式多，相信大家食完真係讚不絕口。
肥仔推介指數：★★★★☆