肥仔平時最鍾意食嘅嘢莫過於燒肉同串燒，成日都叫瘦仔同我食燒肉嘅。今次見到香港仔開咗間新嘅 RUD 燒肉餐廳就毫不猶疑咁扯咗瘦仔入餐廳啦！今次食呢間 RUD 燒肉餐廳主打一人燒肉，自己燒自己嘅燒肉，同其他燒肉店係一張枱一個大爐好唔同。餐廳因為預料到可能要等位所以特別添置咗 The Gulu 等位系統，大家就可以用 The Gulu App 黎預先等候，到咗亦都可以係個 App 到知道。
餐廳評價
品質：★★★☆☆
服務：★☆☆☆☆
清潔：★★☆☆☆
環境：★★★☆☆
餐廳佈局有啲似一蘭拉麪個種自修室風格，一個個位坐低就食配套齊曬，只係差在係開放式唔似一蘭咁有塊板隔住。每個座位都有一個迷你爐，雖然細但係火力好大，啲肉話咁快就熟，所以記得務必睇火同埋唔使較個火去到最大黎燒。餐廳通風良好，燒完一陣都無乜油煙味殘留係個身上面，幾唔錯嘅。
餐廳主要提供燒肉定食，每個定食包括了唔同分量嘅肉類，一碗日式海苔味噌湯、一個白飯和一碗枝豆。 肥仔我再加 $6 換成紫菜珍珠飯，滿滿的紫菜口感豐富。另外餐廳亦都有唔同的醬汁同調味料係餐桌上供客人使用。而呢間餐廳亦都有介紹你食法同醬汁佩搭，每台都有三款唔同嘅醬汁比客人調配，餐牌亦都有生蛋之類嘅配料可以點選，多款調配口味都非常個人化。唯一不足係呢間餐廳似乎人手不足，肥仔睇到餐廳有執唔切枱嘅情況，上餐速度亦都偏慢。
以燒肉餐廳嚟講，呢間嘅價錢相宜，牛肉雖然唔算靚但係燒起嚟都充滿肉汁同油分，口感不俗。如果大家唔食牛肉嘅話亦都可以試下豬肉同雞肉套餐，價錢相宜的確係唔錯嘅選擇。肥仔我從來未見過咁平嘅燒肉餐廳架，而且質素唔差唔係難食唔新鮮，值得支持。以下係 RUD 嘅餐牌：
