評分
四星級酒店
訂房途徑：Trip.com
價錢：$909 連稅
質素：★★★☆☆
性價比：★★☆☆☆
評價
今日我哋下午六點黃昏 check-in，本身係 HP CLUB 嘅會員，網上言論話做會員可以 late checkout。我哋 check in 嘅時候就同櫃枱查詢得知如果想要 late checkout 必須係官網訂房先可以享有，所以大家要注意下。今次酒店安排 27 樓嘅房間畀我哋，唯一好處係望到海景，唯房間窗户右邊景觀比鄰近大廈同香港殯儀館遮蓋，所以亦都建議大家閂右邊個半窗簾以免見到奇怪嘅嘢啦！
呢次 book 酒店時間比較倉猝，星期三先訂房，想 enjoy 酒店自助餐嘅話就要提早訂房，唔係就要落樓去附近嘅餐廳用膳。肥仔好想食嘅自助晚餐 full 曬，諗住食酒店早餐不過北角海逸就無自助早餐，得 set breakfast $85 一位，肥仔聽完心情差曬。不過附近係炮台山嘅港島海逸君綽酒店（Harbour Grand Hong Kong）同一集團嘅早餐就喺自助（walk-in $250）嘅，另外係 41 樓嘅西餐廳價錢不詳，不過坐享無敵海景。肥仔聽完之後就更加心生不憤，好想食自助餐嘅佢非常知不快，逼於無奈我哋就去天后電氣道食嘢了。
打開房門，整體格局精美，進門左邊立即留意到其他酒店普通房好少有嘅煮食間，可惜微波爐、電磁爐及抽油煙機並未通電，旁邊有告示係比月租户使用嘅空間，有啲可惜。
房門右邊就喺廁所，廁所門後側即為馬桶所在位置，打開廁所門可能會被門撞到，要特別小心。廁所空間較小，無浴缸，肥仔唔係咁鍾意。
係 trip.com 訂房嗰陣指定要大牀，但係係 check-in 嗰陣櫃枱服務員表示因為酒店滿晒房，所以只能提供雙牀房比我哋，仲建議將兩張牀拍埋黎彌補。點知道因為牀嘅設計問題拍埋咗都仲係會有一條唔細嘅罅隙，令到瞓覺嗰陣有啲唔舒服。
房間有一張巨型書枱，書枱右手邊暗格有拖板，提供充足插頭位叉電。窗前有玻璃茶几，可以一邊做嘢一邊享受海景，帶有一番寫意。
總結
呢間海逸酒店未必係肥仔會推介大家去嘅選擇，同其他海逸系列酒店相比之下比較遜色。如果大家係唔同網站見到呢間酒店有特價嘅話就要三思啦。
下下星期我哋會去 萬豪 五星級酒店，到時會再出 post 介紹。如果覺得有幫助嘅話記得 share 呢篇文出去比大家啦！